.png?h=a528f066058e9496c5f89f7ae3ba237d51fb852d)
- Нүүр
- Мэдээ, мэдээлэл
- Хоолонд орж байгаа хүүхэддээ юу өгч эхлэх вэ?
152 үзсэн
Parent's Magazine
Хүүхдээ хөхүүлдэгээрээ хөхүүлж, нэмэлт сүү өгдгөөрөө өгнө. Харин нэг ээлжийн хооллолтынхоо оронд нэмэлт каш, тараг, жимс ногоог өгнө. Хамгийн эхлээд, хүүхдийнхаа ходоодонд өнгөр тогтоох хэрэгтэй. Үүний дараагаар хоолны төрлийг нэмэгдүүлж олон төрлийн хүнс өгч эхэлнэ.

Ходоодонд өнгөр тогтоохын тулд бид цагаан будааны шүүс өгдөг. Заавал цагаан будаа гэлтгүй өөр үр тарианы зутан/каш өгч болно. Будааны шүүсийг хийх заавар нүүр номоор зөндөө байдаг. Товчхондоо цагаан будаагаа сайтар угаагаад (угаасан ус нь тунгалаг болтол угаана) их усанд ямар ч нэмэлт амт оруулах зүйл хийлгүй чанаж болгоно. Будаагаа зөөлөртөл нь удаан бага гал дээр чанасныхаа дараа зөвхөн шүүсийг нь өгнө. Эхний удаадаа 1–2 амны халбага байхад л хангалттай. Хүүхэддээ жижиг халбагаар бага багаар өгнө. Хүүхэд идэхгүй байвал хүчилж идүүлэх гэсний хэрэггүй. Харин идэх дуртай байвал хүссэн хэмжээгээр нь өгч болно. За ингээд аажим аажимаар өдөрт 2 удаа, дараа өдөрт 3 удаа гэх мэтчилэн будааны шүүсээ дор хаяж 3–5 өдөр өгнө. Нэмээд нэг зүйл хэлэхэд будааг олон дахин угаахаар будаа бутарч байвал муу будаа гэсэн үг шүү. Тийм будааг хүүхдийн хоол хүнсэнд хэрэглэхгүй байхыг бодоорой.

Үүний дараагаар каш, ногооны зутан, жимсны нухаш, тараг гэх мэт хоолуудыг өгч эхэлнэ. Нэг анхаарах зүйл гэвэл шинээр хоол идүүлэхдээ 1–2 хоног ажигласны дараагаар дараагийн төрөл зүйлийг идүүлнэ. Ингэснээр хүүхдэд тань тэр хоол таарч байна уу, ямар нэг харшил байна уу, баас нь хэвийн байна уу гэдгийг мэдэх боломжтой.

За кашны талаар бичье. Нийтлэлийн эхэнд хэлж байсанчлан цагаан гурил бол хор юмаа, тийм болохоор бидний сайн мэдэх цагаан гурилны орцтой Манная кашийг 8 сар хүртэл нь битгий өг. Хүүхдийн бэлэн найруулдаг Gerber, Агуша, Humana гэх мэт кашнууд байдагдаа, тэрний 4+, 5+, 6+ гэсэн кашуудын найрлаганд цагаан гурил байдаггүй юм шүү. Хэрвээ танайд байгаа бол хайрцаг дээр нь бичсэн орц найрлагыг нь уншаарай. Аа харин 8+ кашнуудад улаан буудайн гурил найрлаганд орсон байдаг юм. Тиймээс 8 сар хүртэл нь үр тариа болон овъёос орсон кашуудыг хийж хүүхэдээ өгөөрэй. Аль болох өөрсдөө каш хийгээд өгөөд байвал хүүхдүүд маань ч эрүүл хоол хүнс идээд, ээжүүд бид ч мөнгөө хэмнэнэ шүү дээ. Эхэндээ дан нэг төрлийн үр тариагаар каш хийж өгнө. Яваандаа хүүхдийн идэж болох хүнс нэмэгдээд ирэхээр баяжуулаад хийнэ. Мэдээж бэлэн найруулдаг каш авчихвал амар л даа. Тэхдээ тэдгээр кашууд чихэр ихтэй байдаг учир байнга хэрэглэх нь зохимжгүй. Хүүхдэдээ анхнаас нь давс багатай, чихэр багатай хоол хүнс идүүлээд сургачихвал хүүхдийн тань эрүүд мэндэд л сайн байх учир бэлэн, найруулдаг хоол хүнс бага хэрэглээрэй. За тэгээд энэ үр тариа гээд байгаад нь яг юу юу байна вэ гэхлээр

Дээрх үр тариануудыг зөөлөртөл нь чанаад дараа нь холигчоор зутан болгож болно. Эсвэл овъёосны гурил, шар будааны нунтаг, гурвалжин будааны нунтаг аваад хийж болно. Манайхан каш хийхдээ сүү хийгээд байдаг. Гэтэл үхрийн сүүг хүүхдэд 1 нас хүртэл нь өгөхгүй байхыг зөвлөдөг. Үхрийн сүүнд хангалттай төмөр, Витамин С гэх мэт амин дэмүүд байдаггүй, харин уургийн концентрац ихээр агууллагддаг ба үүнийг 1 нас хүрээгүй хүүхдийн ходоод хүлээж авч боловсруулж чаддаггүй. Тэгэхээр хэрхэн амттай каш хийх вэ? Хоолонд ороод удаагүй байгаа хүүхдэд ус эсвэл нэмэлт сүүгээр каш найруулж хийнэ. Яваандаа жимсны нухаш, шүүс зэргээр амт оруулж болно. Би заримдаа амт оруулахын тулд 4+ сартай цагаан будааны найруулдаг кашийг шингэн найруулаад дээр нь шар будаа, овъёосоо хийдэг байсан.

Тарагийг бол хүүхэд хоолонд орж эхэлсэн цагаас өгч болно. Аль болох чихэр багатай, өөрөө бүрсэн тараг бол шар усыг нь шүүгээд өгөөрэй. Тараганд ашигтай бактери ихээр агууллагддаг тул хүүхдийн тань ходоодонд сайн хүнс юм. Тарагийг бид ихэвчлэн орой унтахдаа уудаг, харин яг унтахын өмнө уувал бөөрөнд их ачаалал өгдөг гэнэ шүү. Тиймээс унтахаасаа дор хаяж 2 цагийг өмнө уух ёстой. Хүүхэд ч мөн ялгаагүй.

Ногооны зутан болон жимсний нухашны талаар бичье. Хүүхдэд ямар ногоо жимсийг хэзээнээс өгч болох талаар доорх зургаас хараад аваарай. Ногоо, жимсэнд амин дэм маш их агуулагддаг тул бидний байнга л хэрэглэдэг хэдэн ногооноос гадна аль болох олон нэр төрлийн жимс ногоог хэрэглэхийг бодоорой. Одоо үед бол бүх л төрлийн ногоонуудыг тарьдаг, зардаг болсон. Аа харин жимсний хувьд Хятадын муу жимснээс илүүтэйгээр ойн жимснүүдийг хэрэглэхийг бодоорой. Доорх хүснэгтээс харж байгаачлан ойн жимснүүдийг хүүхдэд 8 сартайгаас эхлэн өгч болох боловч диатез зэрэг арьсны харшилтай хүүхэд их идвэл харшлах хандлагатай байдаг. Ер нь ямар ч хүнсийг өгсөн бай, хүүхдэд тань таарч байна уу, тохирч байна уу гэдгийг сайн ажиглах хэрэгтэй шүү.

Одоо харин бор хоолны тухай бичиж эхэлье. Ер нь гадаадууд үхрийн махыг ихэвчлэн 6-8 сартайгаас эхэлж өгдөг. Манайхан бол ихэвчлэн 6 сартайгаас нь эхлээд нь мах бариулаад л амтанд нь оруулчихдаг. Мэдээж зажилж чадахгүй учир эхэндээ мах чанасан шөлөнд бантангаа хийгээд өгөхөд болно. За тэгээд 8 сар хүртэл нь цагаан гурилтай бантан хийхгүй, оронд нь өнөөх үр тариагаа хийнэ. Овъёостой бантан их гоё амттай болдог шүү. Овъёосны гурил, шар будааны нунтаг, гурвалжин будааны нунтаг зэргээр кашаа хийж байгаа шигээ усны оронд нь махны шөлөөрөө хийж байнаа л гэсэн үг. Харин овъёос, будаагаа бүхлээр нь хийж байгаа бол эхэнд хэлж байсанчлан сайтар угаана шүү. Тэгээд болсных нь дараа нь холигчинд эргүүлээд зутан болгочихно. Дуртай ногоог нь хийгээд баяжуулчихна. Чихэрлэг төмс, лууван, хулуу болон брокколи ногоонуудыг бантанд хийхэд их тохиромжтой санагддаг шүү. Дээрээс нь нэмээд бүхэл үрийн гурилаар бантан хийж болно. Гэхдээ овъёостой бантангийн амтыг гүйцдэггүй л юмдаа. Бантангаа хэр шингэн хийхээ бол хүүхдийнхээ дур сонирхолд тааруулан хийнэ. Мах хийхээр бол машиндсан, татсан мах бага багаар хийгээд идүүлнэ. 8 сар хүртлээ зажилж сураагүй болохоор баасаар нь тэр чигээрээ л гараад ирдэг юм. Болж өгвөл үхрийн махаар хоол хийж өгч байгаарай. Шөл ч сайн гардаг бас хонины махыг бодвол хурц биш байдаг. 6–8 сар хүртэл нь өдөрт нэг удаа бор хоол өгөхөд тохиромжтой.

За тэгээд 8 сартайгаас нь хойш finger foods буюу барьж идэх хоол хүнс хийж идүүлнэ. Ногоо жимснүүдээ чанаад гарт нь бариулахаар хэрчээд өгчихнө. Талх, боов боорцогоо бариад иддэг болно. 8 сартайгаас нь эхлээд өдрийн 2 удаа бор хоол өгч эхэлнэ. Хүүхэд хооллохын өмнө болон дараа нь шингэн зүйл сайн уулгавал хоол нь сайн шингэдэг шүү. Нэмээд хэлэхэд хүүхдээ хоолонд оруулснаас хойш өдрийн хамгийн сүүлийн хооллолт буюу орой унтахаас өмнөх хооллолт нь хөхний сүү, эсвэл нэмэлт сүү нь байлгахыг зөвлөдөг юм билээ.